Hjortekalenderen frå Svanøy har blitt ein viktig merkevarebyggjar både for hjortesenteret, Svanøy og Flora dei fem-seks åra den har eksistert.

I år gjer hjortesenterleiar Johan Trygve Solheim ein spesiell vri i forkant av neste års kalenderprosjekt

Han har utfordra leiande naturfotografar til å sende inn sine favorittbilete til kalenderen. Og no held han også døra på gløtt for andre fotografar, anten dei er proffar eller amatørar:

- Vi ønskjer å setje av to eller tre sider av kalenderen og bruke dei beste innsende bileta der. No er det berre å gå i arkivet og leite fram blinkskota, oppmodar han.

Men blodige slakt og oppstilte skrytebilete er ikkje det Solheim er på jakt etter.

- Det kan vere bilete av hjortedyr i skogen, spennande jaktsituasjonar eller miljøbilete med ei historie bak. Men hjort eller hjortejakt må sjølvsagt vere sentralt, og filene må vere store og høgoppløyste, forklarar fotografen og kalendersjefen.

- Vi har sett frist til 1. august til innsending av bilete. Bidraga kan du sende til johan@svanoy.com, og du må leggje med ein kort bilettekst som fortel litt om bakgrunnen for blinkskotet og kven som deltek.