Etter teoretisk utdanning og grundig lærlingtid, er ho no i mål. Sist måndag avla Eikefjord-jenta Reidun Knapstad fagprøva som børsemakar.

- Prøva gjekk stort sett greit, seier jenta som har drive aktivt med skyting frå ho var 11 år gammal.

Det er ikkje noko tradisjonell kvinneutdanning ho har teke, noko ho er fullt klar over.

- Eg har høyrt at det finst to-tre andre jenter som har teke børsemakarutdanning her i landet, seier ho.

Korvidt ho vil halde fram i faget ho no har papir på, er derimot usikkert. Reidun snusar på nye utdanningar og det er difor ikkje sikkert at vi får nokon ny tilvekst lokalt når det gjeld kompetanse på å byggje og reparere skytevåpen. Uansett er ho eikefjording nummer to dette året som har avlagt fagprøva innan dette yrket. I vår bestod også Ørjan Tonheim det tronge nålauget med svært strenge sensorar.