Under jubileumsmiddagen i samfunnshuset laurdag kveld gjekk det eit brus gjennom salen då banksjef Arvid Andenæs i Sparebanken Sogn og Fjordane tok ordet. Frå podiet slo han fast at ein av dei 18 skulpturane som no står utstillt i parken, skal bli verande att i Florø for all tid.

- Vi fann ut at dette ville vere den rette jubileumsgåva frå oss i Sparebanken Sogn og Fjordane. No blir det opp til florøværingane å bestemme kven av skulpturane vi skal kjøpe og avrøystinga har vi alliert oss med Firdaposten for å gjennomføre, sa Andenæs, som fekk ståande applaus for den rause gåva.

Det betyr at dei komande vekene kan florøfolk bruke firdaposten.no som avrøystingsverktøy. Her ligg ute bilete og informasjon om skulpturane, samt ei avrøysting der ein kan stemme på sin favorittskulptur.

Kunstverka som er stillte ut har stor spennvidde i pris. Den mest rimelege har ein prislapp på rundt 80.000 kroner, den dyraste godt over 300.000.

Det var ein svært glad kultursjef Anita Solbakken, som saman med ordførar Bente Frøyen Steindal takka for gåva.

- Held middagen fram på denne måten, så ønskjer eg at den aldri tek slutt, sa Solbakken.