Det har vore stort engasjement kring Sildegutten-statua utflyttarane no har gitt til Florø i samband med 150 års jubileet. Nokre har hevda det er ein kopi av Måløy sin "Sildagut" og at Florø snarare måtte finne noko eige å samle seg om. Men det var ikkje ein kritikar å spore blant dei hundrevis av applauderande tilskodarane i det Sildegutten vart "fødd" laurdag. For denne er unik og typisk for Florø og identiteten stordomstida til sildebyen har gitt oss.

Høgtidleg

Det var noko høgtidleg over stemninga ved hamnetrappa. Dette vart forsterka i det Florø Hornmusikk spelte bysangen "Skjønn er du by".

Den vesle guten i bronse på den naturlege sokkelen over hamnetrappa, vil truleg bli eit viktig symbol for byen.

Dette formidla også ordføraren laurdag. Ho avduka statuen i blafrande blitzlys klokka 18.12 laurdag saman med initiativtakar blant utflyttarane Vigdis Kittang Ramstad. Kunstnaren Nina Nesje fortalde det har vore eit givande oppdrag og takka alle sildegutar og sildejenter som har personleg på telefon og i e-post formidla korleis ein typisk sildegut skal vere.

Hadde skjønt det

Etter avdukinga kom ein mann bort til Nesje og gav følgjande korte kommentar:

"Du har skjønt det".

Det var ord kunstnaren vart tydeleg prega av. For ho var klart inneforstått med at ho her hadde takka ja til eit oppdrag mange hadde meiningar om korleis skulle bli. Ho hadde teke mange signal under vegs. Til slutt hadde ho stolt på seg sjølv. Såleis var den lille kommentaren rette etter avdukinga feedback som varma og som fekk skuldrande til å senke seg.

- Det er akkurat slike tilbakemeldingar eg lev for, kom det frå ei letta Nesje.