Floraordførar Bente Frøyen Steindal har fått merke nedstenginga av den europeiske flytrafikken på kroppen. Ho er ein del av ein 13-personar stor delegasjon frå Sogn og Fjordane Energi som har delteke på Energi Norge AS sin vinterkonferanse, som i år var lagt til den engelske hovudstaden. Der har dei vore sidan onsdag. Men når heimreisa kan ta til, er uklart.

- Det er heilt i det blå når vi kjem oss heim. Eg veit somme har sjekka ut moglegheitene for å leige bil og ta seg heim landevegen via Frankrike, men det kjem eg ikkje til å gjere. Faktisk har vi hatt meir enn nok med å sikre oss tak over hovudet. Trykket på hotella her borte er formidabelt, slik stoda har blitt, seier Steindal til Firdaposten per telefon.

Ho håpar likevel sterkt på å kome seg heim i løpet av helga.

- Om eg framleis sit her borte måndag, er det mykje i timeplanen som kludrar seg til. Eg har rett nok med meg berbar PC, så noko kan eg jo få utført, men langt frå nok, konstaterer ho.

På spørsmål om kva ho skal bruke dei ekstra dagane i London til, svarar ho slik:

- Eg har jo fått mykje kritikk for den skrale engelsken min, så eg kan jo bruke litt tid på å gjere den betre, humrar ordføraren.

- Eg har dessutan allereie fått eit humoristisk tilbod om å sende bort Øyservice for å hente meg. Men eg har høfleg takka nei.