Det var omlag 150 menneske til stades då den andre av i alt fire fotografar vart presentert ved Kystmuseet i Sogn og Fjordane fredag. Og 150 i foayeen på Kystmuseet betyr at folk stod som sild i tønne. Såleis skulle talet besøkande og trengselen både treffe 150-års jubileet og tema fotografen har fanga: Sildetida i Florø.

Samla familien

Etterkommarane til fotografen Malvin N. Horne var alle på plass. Yngstemann, med same namn som fotografmeisteren, tala på vegner av familien før utstillinga vart opna. Familien har no gitt heile arkivet som ei testamentarisk gåve til fylkesarkivet. Hornearkivet er den viktigaste dokumentasjonen vi har på gamle Florø og framfor alt sildetida byen er tufta på. Difor kan vi kanskje seie at arkivet med 20.000 negativ i form av film og glasplater har fanga "Florøsjela".

Fargerik skildring

Tidlegare rektor på gymnaset, lokalhistorikar og sildegut, Bjarte Sindre, vart invitert for å fortelle om korleis det var å vere gutunge den gongen då Florø tok verdsrekordar i fiskefangst.

Han leverte ei poengtert, fargerik og morosam skildring om sine dagar som gutunge i sildetida. Dette sette publikum inn i tida fotografmeister Malvin Horne hadde fanga i linsa si. Fotoutstillinga vil stå på Kystmuseet utover våren og familien skal no trykke opp ein del bilder i frå arkivet dei vil legge ut for sal.