Floras langdistanseløpar og motbakkedronning, kan få god bruk for sin gode kondisjon, når ho til sommaren skal begynne i ein av dei mest utsette stillingane i Flora kommune.

Ho blir sjef for alle omsorgsavdelingane og vil også styre omstillinga der fire tenester skal samlast til berre ei.

– Eg gler meg. Eg er sjølvsagt klar over at det er ein utsett jobb. Eg kan ikkje gjere anna enn å prøve å gjere ein best muleg jobb ut frå dei økonomiske rammene vi har, seier ho.

Stavø kjem frå jobb som lektor ved sjukepleieskulen i Førde. Ho har elles brei erfaring frå ulike sider av sjukepleia i heimekommunen. Ho har dessutan heile 13 år som operasjonssjukepleiar ved sjukehuset i Florø.

– No blir det vel mindre tid til løping?

– Du får mykje energi av løping. Når eg greier å finne tid no når eg pendlar til Førde, skal eg nok finne tid med ny jobb. Og så blir det herleg igjen å kunne sykle til jobb.