Det første brannstiftingsforsøket var i vinterferien, det siste måndag ettermiddag eller kveld. Tilsette ved skulen fann ei flaske med bensin og papir i struten på baksida av skulen, like ved inngangen til 1. klasseavdelinga, då dei kom på arbeid tysdag morgon.

- Her har nokon rett og slett laga ei brannbombe, og det skulle ikkje mykje til før kledningen hadde teke full fyr. Treverket er heilt svartsvidd på baksida, fortel Isak Berle, som er sjokkert over at nokon kan spekulere ut slike handlingar.

- Vi kan også sjå brennemerke i kledningen lenger borte, her er det tydeleg at nokon har prøvd å fyre direkte på med ein lighter eller liknande, legg han til.

Han ser svært alvorleg på hendingar som dette. Både skuleeigar Bremanger kommune og lensmannen vart informert tysdag morgon, og saka er no også formelt meld til lensmannen.

Også ordførar Kåre Olav Svarstad ser alvorleg på denne saka. Han seier det er svært beklageleg at slikt skjer, og håpar at dei som står bak tenkjer seg om fleire gonger, slik at dette ikkje skjer igjen.