I samarbeid med Havly inviterer dei to erfarne Bremanger-musikarane til musikk-kafé på Havly neste fredag.

- Dette er først og fremst tenkt som ein stad å møtast der det sosiale står sterkt i fokus. Havly stiller med lokale, og vi, saman med Kjell Bjarte Varpe, skal sy saman det musikalske og åndelege innhaldet, fortel dei.

Musikk-kafe

En blir ein musikalsk aktivitet i sterk kontrast til alle store prosjekt som har vore gjennomførde i Bremanger.

- Det er kjempeflott med store prosjekt, det skapar engasjement og stor aktivitet i ein periode. No håpar vi å få til ein aktivitet som kan vare, forklarar Norvall Klungresæter.

Korleis tilbodet blir utforma, og kor ofte det blir musikk-kafé er avhengig av responsen blant bygdefolket.

- Vi må rett og slett prøve oss fram. Det tek alltid litt tid å innarbeide eit nytt tilbod, men på litt sikt har vi eit mål om å kunne invitere til musikk-kafé annankvar fredag. Om bygdefolket vil, kan kanskje fredagen bli ein fast utedag i Bremanger, seier Roger Igland.

I tillegg til å vere ein sosial møteplass, der folk kan kose seg med ein matbit og noko godt å drikke, vil musikk-kafeen også vere ein kulturell arena for musikarar og andre til å få spele og vise seg fram.

- Scena er open for alle, unge som eldre, og i ei musikkbygd som Bremanger står dei lokale aktørane nærast i kø. Gjennom musikken håpar vi å kunne mikse generasjonane og styrke samhaldet, seier dei to initiativtakarane vidare.

Det kan også bli aktuelt å invitere musikarar utanfrå til å opptre gratis på den opne scena. I tillegg til levande musikk i fleire bolkar, vil det kvar gong også bli vist musikkfilmar på storskjerm.

- Dette høyrest veldig kjekt ut, seier Anders Igland, Lars Nigardsøy og Marius Hamre, som alle tre går på vidaregåande skule og stort sett berre er heime i helgane.

Dei er ivrige musikarar, og gler seg til å få ei uformell scene der dei kan spele frå tid til anna.

- For oss som bur på hybel er det kjekt å ha eit slikt tilbod å kome heim til, seier dei vidare.

Saman med Martin Husabø Igland blir dei å sjå og høyre på den aller første musikk-kafen, i godt selskap med Bremanger Bossaband, som er ukjent for dei fleste. Kven dei sistnemnde er, og kva dei skal framføre på scena, får vi først vite neste fredag.