Anders Espeset og Svanøy Oppleving stod bak seansen som vart støtta økonomisk av fylkeskommunen.

Lokale vriar

– Målet vårt denne helga var å utvikle lokale menyar basert på dei flotte råvarene vi har rundt oss, fortel Anders Espeset.

Både Ole Jonny Eikefjord, den lokale ølbryggjaren Espen Lothe i Kinn Bryggeri og kokkane Tore Skarstein og Gro Sveen deltok i idémyldringa og det hyggelege utviklingsarbeidet.

­– Dette var utruleg kjekt og vellykka. Intensjonen er å lage eit årleg arrangement på dette. Neste gong kjem vi kanskje til å bruke kreativiteten på andre område enn sjømat, fortel Espeset.

Øl til maten

Ideen med å invitere Espen Lothe er å tilpasse eller utvikle lokale drikkevarer som passar til matrettane.

­– Det konkrete resultatet av helga kjem til å bli eit nytt oppskriftshefte med nye vriar på kortreist mat, trur Espeset, som er på veg med verksemda Svanøy Oppleving inn i sitt andre heile driftsår. Han koordinerer tilboda for turistar og andre gjester på øya, som skal leve opp til namnet Sunnfjords perle.

Cruise

Den lokale turistsesongen i 2009 var prega av litt færre gjester enn venta i bedriftsmarknaden, medan totalresultatet vart ein liten auke i besøkjande gjester.

– Kva betyr den venta auken i cruiseskipsbesøk for deg?

– Vi har fått nokre bestillingar i samband med cruisebesøk. Det er hyggjeleg, men betyr lite økonomisk for oss. Desse gjestene har det aller meste dei treng om bord, avsluttar Espeset.