Nybømarka viste seg frå si beste vinterside søndag.

I løpet av laurdagen hadde dei frivillige i laget laga hoppbakkar i ulike storleikar, kuleløyper i fire variantar, trampegroper og akeløyper som passar for alle.

Slalomløyper

Aslak Holmen hadde også funne fram dei gamle portane til Krokane Alpinklubb og laga både slalom og storslalomløyper alle fekk teste ut. Og tilrettelegginga gjorde skidagen på marka til noko heilt spesielt. For med sol og godt føre gjorde til at dei eldste av oss, som vaks opp på Nybømarka, vart nostalgiske til sinns.

Idyll

Det var ikkje mindre enn 300 på det meste på marka denne søndagen. Turlaget hadde laga til kokekaffi på bål og koka pølse til alle. Dei hadde til og med premiar til alle som var med på kosen. Rundt heile marka hadde familiar funne seg til rette, nokre hadde med seg grill, og andre kveika opp bål i snøen. Medan dei vaksne fekk slappe av med ein kopp kaffi i sola leika borna til dei vart slitne. Då var dei tilbake til "basen" hos foreldra nokre minutt med ein matbit og litt drikke før dei ivra ut i leiken igjen.