Uhellet skjedde rundt klokka 20.30 laurdag kveld, og eit par timar seinare var ein bergingsbil på plass.

Brua er sperra, og i kombinasjon med mykje snø og is, gjer det bergingsaksjonen vanskeleg. For å passere brua, må ein nemleg klatre på utsida av rekkverket.

I følgje sjåføren på bergingsbilen, vil det ikkje bli sett i gang berging før tidleg søndag morgon.

Traileren var lasta med 20 tonn sild til ein verdi av rundt 200 000 kroner, og truleg må hengaren tømmast for fisk for å få bilen oppatt på vegen.

- Dette har vi venta på lenge, og i kveld skjedde det altså, seier driftssjef Per Røys ved Norway Pelagig Kalvåg.

Han har i årevis kjempa for betre vegtilkomst til Kalvøya, og ber no om handling.