Dårlig vær i Nordsjøen har i helga pressa kaikapasiteten i Florø.

- Vi har tatt i bruk det meste vi har av kaier denne helga, fortel hamnesjef Audun Korneliussen. - Kapasiteten på Fjordbase strekk ikkje til når det blir så mange anløp. No er det ikke vanleg med så stor aktivitet, men det er ikkje så lenge sidan vi var ute for det same og eg trur vi kan forvente meir av det i framtida. Så det er ingen tvil om at vi treng å auke kai-kapasiteten, fortel Korneliussen som kan gle seg over at den store aktiviteten også betyr gode inntekter til hamnekassen.

- Eg har ikkje her og no heilt kontroll over kor mange anløp vi har hatt denne helga, fortel logistikkoordinator på Saga Fjordbase, Kåre Bernt Liseth til Firdaposten søndag kveld. Han har hatt ei stri tørn med å koordinere trafikken. - Vi er nok oppe i minst 15 anløp, så det har vore rimelig hektisk, fortel han.

Forutan dei mange anløpa på Fjordbase er dette litt av aktiviteten Firdaposten har observert i løpet av helga :

Ved STX låg søndag kveld tørrlast-skipet «Wilson Maas» og supply-skipet «Bourbon Tampen» og venta på å sleppe til på basen. I Gunhildvågen ligg no «Herøyhav» og lossar på 1000 tonn NVG-sild ved Norway Pelagic-fabrikken, i går lossa dei ferdig «Rødholmen» som hadde 750 tonn sild. NP lasta også fryseskipet «Green Tromsø» med 750 tonn sild til Aust-Europa, før supplyskipa «Dina Supplier» og «Far Star» la seg på vent ved den gamle Global-kaia.

På Fugleskjærskaia har den vesle vaktbåten «Jadi» fått kaiplass ved fiskerikaia, containerterminalen har vore okkupert av det 157 meter lange konstruksjonsfarøyet «Skandi Arctic». Mest truleg det mest kostbare skipet som nokonsinne har vore innom Florø Hamn. Litt lenger aust låg først «Stril Pioner», før ankerhåndteringsfartøyet «Olympic Poseidon» overtok plassen. Det har seinare fått selskap av nesten heilt nye «Olympic Hera» som la seg på utsida.

I tillegg kjem dei vanlege anløpa til hurtigruta og dei lokale skyssbåtane, og også kystvakta var innom ein tur.