Firdaposten hadde tysdag ettermiddag og kveld tekstbasert live-sending frå Flora bystyre sitt møte. (Sjå live-referat nederst i denne saka - flytt pila/peikaren til vindauget, vent medan vindauget teller ned, så kjem referatet)

Det var knytt stor spennnig til om tilbodet ville slå an hos lesarane, noko det verkeleg har gjort.

I følgje live-leverandøren Cover it Live sitt statistikkverktøy var det over 5000 unike brukarar innom live-sendinga, og over 3500 lesarar følgte med lengre enn eit minutt.

I tillegg kom det inn nærare 400 kommentarar frå lesarane.

- Dette er så bra at det nesten er overveldande. Vi vil garantert gjere dette igjen, seier Firdaposten-redaktør Svend Arne Vee.

Han vil samstundes gje skryt til lesarane som deltok i debatten.

- Hovudsakleg var det gode spørsmål og saklege kommentarar, sjølv om ein kunne kommentere anonymt. Eg vart veldig positivt overraska, seier Vee.

Han fortel at han har meir tru på denne typen live-oppdatering, enn på å sende video direkte frå møtene.

- Denne løysinga er interaktiv og spennande å følgje med på, og eg trur dette er ei betre løysing enn ei rein videooverføring, seier redaktøren.

• Kva meiner du? Sei meininga di i kommentarfeltet under!