Sørvesten var ilter og regnet piska meir eller mindra vassrett inn over SU-gjengen då dei gjorde seg klar til støttemarkering. Ein gjeng prøvde seg som innpiskarar med slagord og megafon i den nesten folketomme Strandgata for å samle meir folk. Men responsen var laber midt i beste Dagsrevy- og Hotell Cæsar-tid. Dei få menneska som var å sjå, hasta av garde og var opptekne med seg og sitt.

Likevel, aksjonen gjekk som planlagt, SU-ungdommen la seg i væta på torget, med eller utan regnklede, for å forme eit levande Simon av idealistisk norsk kjøt og blod.

Dei fekk kasta nokre "Vi vil ha Simon heim"-slagord inn i kulingkasta, før dei gjekk i ly på Ungdomshuset Haffen.

Så vi ser at Simon-markeringa i Florø lever vidare. Kvar kveld er det markering på Bytorget for innvandrarane Simon (9) og faren Fkadu, som lever på gata i Italia etter å ha blitt sendt ut av Norge.

- Denne aksjonen har vore planlagt ei stund. Eg synest det fungerte bra. Kampen er ikkje over enno, seier Hildegunn Berge i SU.

Seinare i november skal det vere ein aksjon for Simon i Oslo og då tek SU sikte på å sende nedover nokre frå Flora SU til å delta.