Halvard Husefest Lunde lanserte i vår ein idé om å gjere om den gamle vasstanken i Likkjeåsen til eit utkikkstårn til bruk for kunst og kultur.

Sparebanken Sogn og Fjordane ønska å lodde stemninga for om dette kunne vere banken sitt store prosjekt i samband med 150-årsjubileet, der store delar av banken sin årlege gåvepott skulle gå til tårnet.

No har banken bestemt seg for å ikkje gi støtte til prosjektet i denne omgang.

Avgjerdsla er basert på ei heilskapleg vurdering av stemmetal, engasjement og tilbakemeldingar.

- Vi har fått ganske klare tilbakemeldingar på at dei som er aktive i ulike lag og organisasjonar synest det er viktig med dei årlege gåvekronene til drift av laga, sjølv om nokre óg meinte dei kunne avstå midlar dette året, seier Tom Staveteig i Sparebanken Sogn og Fjordane.

Avstemmingar

Firdaposten oppretta ei avstemming på nettsidene sine. I tillegg var det ei eiga SMS- avstemming blant Sparebanken Sogn og Fjordane sine kundar. Begge plassar hadde ein høve til å komme med utfyllande kommentarar.

- Det vi ønskte var å finne ut om dette var eit prosjekt som breidda av innbyggjarane i Florø slutta opp om, seier Staveteig.

- Vi stilte og spørsmål om ulike lag og organisasjonar var villige til, dette eine året, å avstå frå gåvetildeling slik at midlane kunne gå inn i tårnet. Då ville ein kunne realisere tårnet ved hjelp av banken sine fyrtårnsmidlar og andre bidrag frå lag og organisasjonar i byen, seier han vidare.

Stort engasjement

Avstemminga avdekka at det var stort engasjement i saka.

2231 personar gav si stemme på Firdaposten sine nettsider.

Av desse var 51 % for og 49 % imot at banken brukte gåvepotten i Florø til formålet.

Nokre oppretta facebook-gruppe til støtte for tårnet. Denne har fått 674 medlemer. Av dei som svarte på banken sine nettsider, var 103 personar for og 4 personar imot.

Kan søke gåvetildeling

- Vi har tatt desse tilbakemeldingane med oss i vurderingane om utkikkstårnet i Likkjeåsen skulle bli det store gåveprosjektet for banken i jubileumsåret. Vidare har vi lagt vekt på at det var stort stemmetal på Firdaposten sine nettsider og at avstemminga der vart om lag uavgjort, seier Staveteig.

- På bakgrunn av dette har vi gjort vedtak om at vi ikkje kan bruke store delar av neste års gåvepott til tårnprosjektet. Vi vil som før vere opptatt av å støtte dei mange lag og organisasjonar som søkjer om støtte, seier han.

- Blir det søkt om støtte til tårnet, vil søknaden verte vurdert i konkurranse med alle andre søknader som kjem inn til den ordinære, årlege gåvetildelinga, understrekar Staveteig.