Går det som dei aktive i koret Jomentum ønskjer, vil den gamle musikkpaviljongen ved Likkjevatnet vere gjenreist til byjubileet.

I helga var 35-40 deltakarar samla i forbindelse med haustens prosjekt, som er innøving av musikalen «Kjærlighet og musikk i paviljongen» av Siv Førde.

–Det blir ein musikal som er basert på samtalar med eldre florøborgarer, og bygd opp kring kjende og kjære slagerar frå ei anna tid, i tillegg til nokre nye. Musikalen følgjer den 90 år gamle Malen og hennar tankar og minne frå 1935 og framover i tid, mesteparten vil vere forankra i miljøet kring den gamle paviljongen, fortel ho.

–Vi set opp tre framsyningar på Samfunnshuset, to i februar og ei i april. Alle inntektene skal gå til å gjenreise paviljongen. Vi legg opp til at alt arbeidet skal gjerast på dugnad, seier Førde vidare.

–Det har vore ein spennande jobb, fortel Torstein Kvenås.

I samarbeid med Jomentum har han utforma skissene som viser korleis paviljongen kan bli sjåande ut når den etter planen skal stå klar til våren.