Amundsen hevdar den raudgrøne regjeringa er skuld i det han meinar er ein asylpolitikk heilt utan kontroll, og lovar at dei skal ordne opp i både innvandrings-, integrerings- og asylpolitikken om dei kjem i regjering etter valet.
- Der dei andre landa i Europa har stramma inn har Noreg liberalisert, og resultatet er at det kjem tusenvis av grunnlause asylsøkjarar hit, slo han fast. - UDI, som var den store vinnaren ved revidert nasjonalbudsjett gjev urettmessig opphaldsløyve berre for å ta unna køa, påstod han.

Vil endre finansieringa av sjukeheimsplassane.

Amundsen brukte mesteparten av taletida til å snakke om asylpolitikken, men var også innom mellom anna eldreomsorga.

- Valkampen har starta denne veka, det ser vi når Jens Stoltenberg igjen lovar at vi skal få ein verdig eldreomsorg. Dei som hugsar godt vil hugse at han for fire år sidan lova at eldreomsorga skulle skine. No kjem han med dei same lovnadane, sa Amundsen som ikkje har den store trua på dei raudgrøne. - Vi vil at staten skal finansiere sykeheimsplassane, slik at vi får det same tilbodet over heile landet uavhengig av kommuneøkonomien. Det er jo det same som vi har når det gjeld andre ordningar som sjukeløn og dagpengar, sa han vidare.

Trur på fornya tillit

Åge Starheim, som for fire år sidan blei innvald på stortinget som den første Frp-politikaren i historia trur på fornya tillit sjølv om oppmøtet utanfor Amfisenteret var heller dårleg.

- Eg er optimistisk når det gjeld å få halde fram på stortinget, ved dei to meiningsmålingane som eg har å halde meg til var vi det nest største partiet. Men det krev at vi står på heilt fram til valdagen, vi kan ikkje skulde på andre enn oss sjølve om vi ikkje lykkast, sa Starheim.

Fleirtal forpliktar

- Dei som vil ha ei ny regjering må bruke stemmeretten sin, elles blir det fire nye år med raudgrøn regjering og det har vi ikkje råd til, meiner Starheim.

Men sentrumspartia vil jo ikkje samarbeide med Frp, og Frp vil ikkje støtte ei regjering dei ikkje er med i, kan vi då forvente at dei borgarlege skal få på plass ei styringsdyktig regjering?

- Ja, det trur eg. Då må leiinga i partia innsjå at dei har eit ansvar for å gje landet ei borgarleg regjering, det er ikkje så mange sakene som Frp, Høgre og Krf er usamde i og det vil dei innsjå om dei set seg ned for å diskutere. Dei sakene vi er usamde i er det råd til å leve med. Det har jo dei raudgrøne klart, avsluttar ein optimistisk Starheim.