Hesjande, våte, engasjerte og glade 4H-arar har invadert garden til Jostein og Målfrid Midtbø i Norddalsfjorden. Ei veke med leirliv gir og nokre nye erfaringar. Som at hesjing i sandalar kan vere farleg om ein er glad i føtene sine.

- Eg kjem frå ein gard, men vi driv no ikkje på slik som dette, ler Anita Døsvik (14) frå Sør-Trøndelag.

- Litt vanskeleg å vinkle ljåen. Det såg lett ut da han viste oss det, seier Jan Erik (15) frå Lerdal, og peikar på ein av instruktørane, Erling Midtbø.

- Vi slo slik for hand heile jordet då eg vaks opp, fortel Erling. - I 1952 kom første traktoren. men heilt fram til i dag slår vi med ljå der traktoren ikkje kjem til.

I fleire dagar har 4H-arrangementet vore førebudd i Norddalsfjorden. Opningssermonien starta onsdag i Gloppen med eit høglytt opptog med 17 ulike nasjonar representert. Leiv Sølvberg (64) frå Naustdal fekk då Kongen si fortenestemedalje i sølv for sitt viktige arbeid for 4H.

- Det vi ser er at alt tek mykje meir tid enn vi hadde trudd, seier Helge Sårheim.

- Vi sleit mellom anna med å få kontakt med ein buss-sjåfør som drog før vi fekk informert han om kva som skulle skje her inne. Det skal ikkje mykje til før det blir ein halvtime sprekk i programmet, seier Sårheim, som hadde med seg fire bussar fullasta med ungdommar til Norddalsfjorden, fredag.

Les meir i papirutgåva tysdag.