Åtte ungdommar frå Haffen reiser denne helga til Malakoff Rockfestival på Nordfjordeid. Dei får både turen og billettane gratis, som «løn» for arbeidet dei har gjort på ungdomshuset det siste året.

Kristine Kjellevoll Aase (15) har til dømes jobba i kafèen på Haffen, Thomas Esp (15) har pussa den opp.

– Det har ikkje vore slitsamt akkurat, men det har blitt ein del oppvask, og myyykje rydding, seier Kjellevoll Aase. Therese Ellingsund Redal (15) har ikkje hatt ein like fysisk krevande jobb, men har likevel gjort ein viktig jobb for ungdomshuset gjennom å sitte i Haffenrådet.

Sparebanken Vest sponsar festivalbillettane til ungdommane og dei tre vaksne som skal vere med. Dei reiser oppover med buss på fredag, og skal bu på campingplass.

– Dette fortener ungdommane fordi dei har vore så flinke. Dei har ei positiv haldning i arbeidet, no får dei sjå at det løner seg, sier ein av dei vaksne som skal vere med, Merete Kjellevoll Aase.