Firdaposten har tatt ein ringerunde til dei lokale verksemdene som driv med overnatting. Ingen av dei har ein nedgang som følgje av finanskrisa. Tvert om, fleire kan melde om betre tal enn rekordsommaren 2008.

Ned i Sogn og Fjordane

-Vi har ikkje tal å samanlikne med i fjor, men det har vore travelt, seier Amanda Heartness ved turistinformasjonen i Florø. Hennar inntrykk er at det er fleire nordmenn som ferierer i heimlandet er enn før.

-Det er veldig mykje norske turistar. Det er mykje folk som betaler for guiding, seier Heartness.

Statistikk frå Fjord Norge viser at overnattingar i Sogn og Fjordane i mai 2009 gjekk ned med 5,6 prosent i forhold til året før. Talet på utlendingar gjekk ned med heile 27,8 prosent medan talet på turistar frå Norge gjekk opp med 6,9 prosent.

Bra i Kalvåg og på Krokane

Hos Svein Inge Fosse på Knutholmen i Kalvåg er det gode tider. Dei har hatt ein liten auke i forhold til i fjor.

-For oss er vêret viktigare enn finanskrisa. Vi har ikkje så mange utlendingar og heller ikkje bussar. Vi satsar meir på reisande frå nærområdet, seier Fosse som hittil i sommar har vore så godt som fullbooka.

-Det har vore bra også når det har vore dårleg vêr. Det ser også bra ut på bedriftsmarknaden utover hausten.

Også hos Egil Melvær på Krokane Camping har dei hatt ein oppgang sidan i fjor.

-Omsetjinga hittil i år er opp fire prosent i forhold til i fjor, seier Melvær. Han opplev ein nedgang i britar. Elles er det mykje norske, tyske og nederlandske turistar. At næringslivet fungerer er viktig for Melvær.

-Så lenge dei har oppdrag på STX så har vi godt med utleige, seier Melvær.

Auke på Quality

På Quality Maritim hotell har dei også hatt ein liten auke trass i ein liten svikt i utanlandstrafikken.

-Vi har det beste året så langt. Men det er knytt like mykje til næringslivet. Det er litt tidleg å sei noko om årets turistsesong, seier bookingansvarleg Gro Leni Hansen.

På Farmen i Iglandsvik i Bremanger har dei både restaurant, gåvebutikk og overnatting. Dei har bra belegg til langt ut i september.

-Vi har oppgang frå i fjor og det er bra med tyske og norske turistar, seier May-Britt Bratseth.

På Svelgen Hotell lever dei for det meste av næringstrafikken. Hos dei er det omtrent som i fjor.

-Dei som har bussgrupper merkar det nok. Vi har omtrent like mange individuelt reisande som i fjor, seier fungerande dagleg leiar Jostein Eimhjellen.