Det seier ein poengtert professor i samanliknande politikk, Frank Aarebrot i hans 1. mai-tale i Svelgen i går ettermiddag. Ein tale som i hovudsak tok føre seg utfordringane knytt til finanskrisa.

-Eg vil appellere til at arbeidarrørsla i den situasjonen verda har komen opp i, at dei må ta på seg skylappar og berre vere opptekne av å skape nye arbeidsplassar, seier Aarebrot og legg til at andre prioriteringar bør leggjast bort inntil vidare.

-Stoltenberg bør vere den neste Nygaardsvold, og ikkje fokusere på anna enn å skape nye arbeidsplassar.

Sparkar mot Førde

Men det er ikkje berre rikspolitikarane på Stortinget som utelukkande bør fokusere på å skape arbeidsplassar. Også lokalpolitikarane bør kaste bort alle andre omsyn til fordel for å skape arbeidsplassar, seier Aarebrot og sparkar mot 1. mai-komiteen i Førde som ville protestere mot den store gruveutbygginga i Vevring under deira 1. mai-markering.

-Det er nok av stein i Sogn og Fjordane. Dei som kjem med forslag til nye arbeidsplassar skal ha forrang, alt anna blir berre distraksjonar, seier Aarebrot.

Støttar Terra-kommunane

I talen sin i Svelgen sparka Aarebrot også mot regjeringa si handsaming av Terra-kommunane, mellom dei Bremanger.

-Den såkalla Terra-skandalen kom eigentleg eit halvt år for tidleg. Hadde dette skjedd eit halvt år etterpå, ville Terra-kommunane fått hjelp frå Staten sidan det ville bli sett på som ein del av finanskrisa, seier Aarebrot og understrekar at mediebildet av dei dumme Terra-kommunepolitikarane som let seg lure ikkje er korrekt.

-Vi trudde det var slik, men Terra-skandalen var eigentleg forvarselet til finanskrisa, seier han.

Ta ungdom på alvor

1. mai-markeringa i Svelgen vart opna av ordførar Kåre Olav Svarstad, før Svelgen skulemusikk underheldt publikum med tre musikkstykke.

Den fyrste appellen vart halden av ungdomsrådsleiar i Bremanger, Lina Vågene, som understreka at ungdom også har viktige innspel i samfunnsdebatten.

– Det er viktig å ta ungdom på alvor. På den måten kan lokalpolitikarane våre få andre perspektiv på sakene. Men dei må også ta meir initiativ utanom valåra, understreka ho i sin tale.

Dagens andre appell var ved HTV ved Elkem Bremanger, Knut Sande. Han viste til skuffelsen over at regjeringa ikkje har innfridd valløfta om industrikraftregimet.