– Dette er ein veldig sterk prestasjon av Henrik. Han kom inn som ein outsider, i konkurranse med to klatrarar som begge hadde klatra frå dei var ein neve stor og som klatrar for norges rikaste klatreklubb. Så at han klarer å konkurrere med desse, han som i realiteten berre har ein klubb bak seg og som berre har klatra i halvanna år, det er ein enormt sterk prestasjon.

Det seier ein særs nøgd Terje Grøneng, leiar i Florø Klatreklubb.

Under klatre-NM i Gjøvik i dag, stod det likt mellom tre av klatrarane i finalen. Det vart difor duka for superfinale. Der stod det endå ein gong relativt likt. Og etter det Firdaposten kjenner til, var det ein dommaravgjerdsle som måtte til for å avgjere konkurransen. Jacob Heber Norum frå Kolsås klatreklubb tok fyrsteplassen, Henrik Mathiesen Wefring frå Florø delte andreplassen med Thilo Schröter frå Kolsås klatreklubb.

Grøneng var ikkje til stades under NM sjølv, men etter det han har høyrt stiller han seg tvilsam til dommaravgjerdsla.

– Etter som eg forstår var det litt spesielt. Dommaren hevda at han som vann hadde etablert seg på eit klatretak høgare enn dei andre. Dette var det stor usemje om, seier Grøneng.

Henrik Mathiesen Wefring er sjølv komfortabel med dommaravgjerdsla.