Ein jeger frå Balestrand blei tysdag frifunnen for å ha jakta uforsvarleg då han hausten 2006 skaut ei hjortekolle på innmark i Balestrand, melder Sogn Avis på sine nettsider .

Det var mørkt då jakta gjekk føre seg på bøen, men ikkje mørkare enn at jegeren, med gode optiske siktemiddel fann det forsvarleg å skyte. Hjorten blei felt på kort hald med eit skot som ekspertar ved flåing og handtering av slaktet fann ut var heilt korrekt plassert.

Men politiet fekk tips om at jakta den aktuelle novemberkvelden var uforsvarleg, og valde å rykkje ut til staden. Der kverrsette dei hjorten og det blei seinare reist sak mot jegeren, som heile vegen nekta å ha jakta på ein måte som var i strid med lover og reglar. Han blei seinare dømd i Tingretten, og valde å anke saka.

Etter grundige åstadsbefaringar og vitneførsel frå begge sider, kom lagmannsretten tysdag fram til at mannen ikkje hadde brote regelverket.

Mange av landets stortviltjegerar har venta på den prinsippielt viktige dommen, som i verste fall kunne sett stopp for all bøjakt etter hjort og anna storvilt. Det hadde i så fall vore eit paradoks, sidan forsking viser at langt færre dyr blir skadeskotne under bøjakt enn under jakt i skogen.