Mellom 40 og 50 menneske møtte fram for å gå i fakkeltog for Israel i Florø måndag kveld. Det var tilreisande frå fleire stader i fylket, mellom anna Jølster og Førde.

Det var Erlend Bøe i Sogn og Fjordane FpU som sto bak arrangementet, og med seg på laget hadde han Norge i dag-redaktør og Israel-venn Finn Jarle Sæle.

Forseinka

Demonstrasjonen vart først veldig forseinka, då Sæle hadde køyrd feil på veg frå Bergen til Florø.

Israel-venner sto på Amfi-parkeringsplassen og fraus i nesten ein time før ein fekk melding om at Sæle snart var framme. Då gjekk fakkeltoget roleg gjennom Strandgata og Markegata, og enda opp i parken, der dei møtte nyankomne Sæle.

Stemninga var god trass den kalde vinden, og deltakarane sang mellom anna "Shalom malachem", dansa og heia på Israel. I front i toget var det to israelske flagg og eit norsk.

Appellar

Etter demonstrasjonen var det appellar i paviljongen.

Finn Jarle Sæle gjekk her til åtak på Hamas og på norske media. Sistnemnde meiner han er svært partiske i dekkinga av Israel-Palestina-konflikta. Han meiner at det Israel har gjort er fullt lovleg, og at dei ikkje har brote menneskerettane. Han refsa også mellom andre Kristin Halvorsen og Kåre Willoch for deira ståstad.

Sæle gav Hamas skulda for krigen. Han meinte også at dei nye bombene Israel har nytta i denne krigen kun har ti meter sprengradius, og at media har unnlete å ta inn over seg dette.

Statsministerkandidat

Han skrytte også veldig av Erlend Bøe sitt initiativ, og sa han håpte dette var starten på noko i Sogn og Fjordane. Han meinte også at Bøe om nokre år ville bli statsministerkandidat.

Bøe sjølv nytta sin appell til å kun snakke om ytringsfridomen. Han synest ikkje det gjorde noko at så få hadde møtt fram, det var ikkje talet på folk i toget som var viktig, men at folk turde å stille opp og vise meininga si.