Med ei rekkevidd på vel 12 mil utan lading, meiner Ålesund-verksemda Admiral Auto at dei har nettopp den bilen Flora kommune bør satse på om dei meiner alvor av å gjere Flora til «el-bilbyen».

– Vi har merka oss vedtaket i Flora kommune, om at dei ønskjer å satse på elbilar i tida framover. Difor kjem vi også til å ta kontakt og be om å få presentere nyvinninga vi no lanserer, seier Admiral Auto-sjef Arild Knotten.

Nyvinninga han snakkar om er den nye utgåva av elbilen Reva, som er den første serieproduserte elbilen med såkalla lithium-ion batteri. Den nye batteritypen aukar køyrelengda på elbilen til i overkant av 120 kilometer før den treng lading.

Reva blir produsert i India, og har blitt ein salssuksess. Bilen sel svært godt på Austlandet for tida. Også i andre land, t.d. Storbritannia, har salet tatt av.

Toppfarten på den nye Reva-utgåva er 80 kilometer i timen, og det tek rundt seks timar å fullade bilen.