Gruppeleiar i bystyret for Frp, Bjarne Holme, har på vegner av Flora Frp bede Fylkesmannen gjennomføre ein såkalla lovlegheitskontroll av eit bystyrevedtak i fjor haust, der det blei løyvd 936000 kroner til aksjeselskapet som driv Florø Idrettssenter. Pengane er meint å skulle dekke selskapet sine rentekostnader på eit lån på rundt 15 millionar kroner. Men Frp meiner vedtaket er eit forsøk på å omgå lovverket.

–Fylkesmannen har tidlegare vendt tommelen ned når det gjeld å gjere om ansvarlege lån til tilskot. Vi ser liten forskjell på dette og det som no skjer. Dette er berre ein ny vri for å omgå Fylkesmannen sine tidlegare vurderingar, skriv Holme i brevet.

Flora Frp meiner at kommunen sin økonomiske situasjon burde tilseie at ein ikkje brukte pengar på denne måten.

Tidlegare har også SV og Venstre vore kritiske til økonomiske disposisjonar opp mot Florø Idrettssenter.