Følgjet på om lag 30 personar, i hovudsak menn og ungar, frå Libanon, Irak, Somalia og Tsjetsjenia i tillegg til fleire palestinarar, gav sterk lyd frå seg og markerte seg tydeleg på parkeringsplassen utanfor kjøpesenteret i Florø.

Dei bar plakat som sa: «Stopp med drepinga av barn», veiva med palestinske flagg og synte fram plakatar med bilde av offera frå aviser og blad. Innimellom kom taktfaste tilrop som: «Ned med Israel, ned med USA".

– Vi kjem til å demonstrere kvar einaste dag framover så lenge Israel held fram med terroren sin mot sivilfolket i Gaza, lova Bsharat, palestinsk flyktning og talsmann for demonstrasjonen.

– Vi takkar Norge. Her kjenner vi oss trygge. Det er likevel underleg at det ikkje kjem sterkare reaksjonar på brota på menneskerettane, sa den palestinske talsmannen.