Ellingsund arbeider i SFE Nett i Florø og tek oss med opp på taket på mur/betongbygget som fekk Flora kommune sin byggeskikkpris i 1998.

Utsikt til forfall
- Eg er sjølv gammal Florøgut, fødd i 1947 og oppvaksen i ytre Strandgata. Slik sett kunne eg vore ein del av aksjonskomiteen for «Florøsjela», men er det ikkje fordi eg er rykande ueinig i tankegangen som ligg bak, seier han og slår ut med hendene.

- Aldri har vel husa der ute, med få heiderlege unnatak, vore styggare enn no, legg han til.

Frå SFE-taket er utsikta variert, frå Hestenesgata og vestover via Amfi med betongtårnet, slakteriruinen, dei gamle 1800-talsbuene, kaier og bygningar med skrå og flate tak, til kyrkjespiret og Fugleskjerterminalen, og med dei runde, skogvaksne åsane som vakker innråming.

- Dette er «50-tals-sjel»
- La oss få ein diskusjon om god og moderne arkitektur, men kom ikkje med flosklar om ei «sjel» som er gått ut på dato, seier Ellingsund og klesser til:

- Dette «sjela» er den eg voks opp med på 1950-talet. Då var det var 23 butikkar og verksemder i ytre Strandgata frå «Fiskematen» til Trovik. Då budde er meir folk i gata enn i heile Eikefjorden. Denne tida er nostalgi og for lengst forbi. Å starte underskriftsaksjonar for å bevare det «pittoreske» i ei gate der husa rotnar ned, det står for meg som bakstreversk, seier Ellingsund engasjert.

«Turistflorø»
- Haavebua er vel eit eksempel på eit vellukka byfornyingsprosjekt?

- Ja, saman med hotellet, ikkje som Haavebua åleine. Kvart prosjekt må finne ei form som kan fungere i vår tid. Å drive «Trovikkvartalet» som det er, har mange nok prøvt, svarar han.

- Enkelte ser for seg at gamlebyen kan bli senter for nisjeforretningar som vil trekke til seg folk som er blitt lei av kjedar og handelshus?

- Dette er eit opplegg for «Turistflorø» tre-fire veker om sommaren. Rein ønskjetenking som kan fungere på papiret og i solskinsver, seier Ellingsund.

Han viser til lysande eksempel i Bergen.

- Sjå kva dei får til blant 1700-talshus på Nordnes og ved Damsgårdsundet, legg han.

- Torpedere utviklinga
- Det er vel fritt for einkvar å debattere byen si utvikling?

- Sjølvsagt. Det eg stiller spørsmål ved er kva ein vil oppnå med ein underskriftsaksjon mot eit prosjekt. Så bakkar dei ut med at: « Vi er ikkje premissleverandørar og ville berre reise ein debatt». Det blir for lettvint. Dette er ei gruppe med veletablerte borgarar som vil legge sterke føringar på einkvar investor som vil prøve seg i gamlebyen, og som kan torpedere det som kunne bli starten på eit ny utvikling av Strandgata i Florø. Ja, til dei grader at eigaren ikkje orkar tanken på årevis med skuggeboksing og vel å selje seg ut, seier Ellingsund til slutt.

BILDE: Florø - Før og no

Diskuter på Kystpuls: Bevar Florø si sjel