ONSDAG KVELD. Ein liten farkost kjem sigande gjennom Ålvorsundet. Padlaren nærmar seg Prata i godveret, tett ved ein engelskmann som prøver fiskelykka.

Morten Abildgaard (26) har gjort alvor av draumen om Norge på langs. No er han komen til Vestlandet og Florø. Han har nett hatt to fine dagar på Atløy der han har familie. Han ser uforskamma pigg ut med tanke på at han har padla heile dagen, og no er klokka åtte på kvelden.

VI MØTER ein hyggeleg, jordnær og ambisiøs ung mann som nyter på nært hald den fantastiske naturen Norge har. Det er noko Lars Monsen-aktig over den ubarberte og solbrente bergensaren. Det engelske ekteparet dukkar opp att og vil gjerne hilse på den padlande vikingen. Engelskmannen viser seg å være ein pensjonert kaptein i sjøforsvaret og blir veldig interessert i å vite kva slags nødpeilesendar og GPS Morten brukar på turen. Etter å ha demonstrert diverse tekniske vedunder og ivrig diskutert den teknologien, nikkar kapteinen nøgd og ønskjer Morten god tur vidare.

– Eg er nok ein utprega friluftsmann som elskar sjøen. Den opprinnelege planen var å gå Norge på langs, men eit dårleg kne sette stoppar for planane. Og då var valet enkelt: Norge på langs, sjøvegen, fortel 26-åringen.

TUREN STARTA frå Lindesnes 2. mai, og Morten har rekna å bruke fire månader til Nordkapp. For eit år sida hadde han inga padleerfaring. Eit intenst år med jamleg padletrening, også vinterstid, har vore heilt nødvendig.

– Eg har snakka mykje med Robert Løken som i 2005 padla same rute, og han har vore til stor hjelp, seier Morten mens han smører ansikt, nakke og armar inn med myggstopp. Vinden har løya på kvelden, og knotten surrar ustanseleg rundt øyra på oss.

– Eg er ikkje ute etter å slå rekordar eller bli ein ny Lars Monsen. Eg er på tur for å nyte Norge frå eit lågare perspektiv enn fjellet, presiserer Morten.

BRØNNØYSUND er halvvegs til målet, og i forhold til tidsplanen ligg han svært godt an. Han har vore heldig med veret og har så langt berre hatt tre små regnbyer.

– Heilt greitt. Det kan bli litt for mykje sol også, smiler den sympatiske karen.

Torsdag la han inn kviledag i Florø, for å få fiksa på litt tekniske detaljar og få seg ein tiltrengt dusj. Elles er det ingenting som hastar. Morten gler seg over turen og tar ein dag om gongen. Han har også fått mange nye kjenningar på vegen nordover.

– Eg treffer hyggelege menneske overalt, med unnatak av ein som meinte at eg ikkje hadde noko på sjøen å gjere i farkosten min, humrar han.

Morten fortel villig om padleturen. Planlegginga, familien, kjærasten, jobben, kollegaer, skeptikarar og betrevitarar. Det er tydeleg at ikkje noko er overlate til tilfeldigheitene. Han har heller ikkje noko problem med å tilrå ein slik tur.

Dei som har lyst til å følgje Morten, kan sjå innom nettsida www.vannblemmer.no. Trass i namnet og prosjektet så har det blitt få av blemmene så langt.