Etter å ha fyrt kvarandre skikkeleg opp inne i gymsalen, starta protesttoget til vidaregåande-elevane i Florø. Med tindrande klare parolar og klare meldingar til fylkespolitikarane om at dei må halde løfta sine, gjekk toget frå skulen og mot sentrum.

Som ein gest til andre truga prosjekt i byen, svinga det lange protesttoget innom Nærsjukehuset, før dei inntok Strandgata og Rådhusplassen.

Og tidspunktet er ikkje tilfeldig. Denne veka pågår ein landsdekkjande aksjon der elevar set fokus på dårleg arbeidsmiljø i norske skular. At dette fall saman med fylkespolitikarane sin heilomvending når det gjeld midlar til renovering i Florø, gjorde ikkje kamplysta til elevane mindre.

– Vi gjer ikkje dette for moro skuld. Utdanninga og framtida vår avheng av gode arbeidsvilkår og læremoglegheiter. Vi føler problema på kroppen kvar einaste dag, slo elevrådsleiar Miriam Hestenes Eika fast i sin appell.

Saman kravde elevane at byggesteg 1 kjem i gang allereie i inneverande fylkestingsperiode.

– Det vil i det minste føre til at dei mest prekære manglane blir tekne hand om, sa elevrådsleiaren.