Hammerseth er tydeleg på at om Nærsjukehuset no blir lagt ned, må bygg og tomt seljast for ein symbolsk sum til kommunen eller private aktørar. Det var slik Helse Førde overtok sjukehuset frå fylkeskommunen då helseføretaket vart oppretta. Kutt i sengeposten i Florø meiner han går mot utviklinga i samfunnet.

– Rehabilitering er noko vi ikkje kan bygge ned i dette fylket slik Helse Førde no er i gang med. Rehabilitering er eit område vi snarare har større behov for i Florø, Lærdal og Eid og distriktet elles i framtida, så kan heller spesialistavdelingane ligge i Førde, slår Hammerseth fast.

Regjeringa står bak

Hammerseth var tidleg ute med å påpeike at ei satsing, eller vilje til å drive, kjem til syne ved øyremerkte tilskot i statsbudsjettet.

– Denne regjeringa kjem til å godkjenne nedlegginga av Nærsjukehuset, noko som er ein sti Helse Vest og Helse Førde no har trakka lenge nok, kjem det frå Frp-politikaren.

Han peikar òg på det ubegripelege i at regjeringa ikkje klarer å oppretthalde eit nærsjukehus når tre ministrar og leiaren i finanskomiteen er frå fylket. For slik han ser det er Helse Førde pressa opp i eit hjørne for å treffe sparetiltak.

– Useriøst

Men dette betyr ikkje at han meiner arbeidet i styret har vore godt. Faktisk til tider useriøst, skal vi tru Hammerseth.

Han er sjokkert over styreleiar Clara Øberg si handtering av informasjon i saka der dei tilsette vart informerte om nedleggingsvedtaket gjennom media.

– Det er ikkje berre klanderverdig, det verkar direkte useriøst når det kjem frå ein styreleiar i eit helseføretak, tordnar Hammerseth og krev at Øberg går frå stillinga si.