Mindretalet med Venstre og Trond Ramstad Olsen i spissen ønskte å avgrense skjenkinga til kveldstid etter klokka ni.

Dermed drog det seg til ein halvannan times alkoholdebatt av godt gammalt merke i bystyret tysdag.

Ramstad Olsen meinte saka ikkje handla om skjenking og restaurantdrift i vanleg forstand.

– Bowlingen er blitt ein suksess, og mange barn og unge går der. Eg synest ikkje dette er nokon særleg god kombinasjon, sa han og viste til Bergen der dei hadde valt å kutte ut skjenkinga.

Vore i tvil

Det var ein viss spenning då Audun Hammerseth (Frp) tok ordet, då han tidlegare har vore skeptisk til servering i hallen ut frå liknande syn som Venstre.

– Ja, eg har vore i tvil, men etter å ha samsnakkast i gruppa, er vi samde om at Bowling 1 bør få løyve. Alkoholpolitikken i Flora skal drøftast for ein ny periode til sommaren. Då har Bowling 1 åtte månader med argusauge på seg, og eg tenkjer dei styrer det med ansvar, sa han.

Bowlinghallen fekk til slutt løyve, mot 12 av 35 røyster.