Til Utkantfestivalen i Gulen første helga i august har kjøparen av bilethoggaren Knut Steen sitt omstridde Kong Olav V-monument, Ola Braanaas, sett saman eit tettpakka program. Børge Bjartmann Bjerck, Oddvar Torsheim, Nora Brockstedt og Transjoik er berre nokre av bidragsytarane til den folkelege festivalen.

Hovudarrangementet laurdag vert toppa med avduking av kongemonumentet. Årets arrangement har passande nok fått namnet «Heilt konge!».

Vert sendt på bursdagen

Når eit monument av denne storleiken skal plasserast på ei høgd ved Skjerjehamn, må arrangørane ty til finurlege løysingar.

- For å lage ein veg opp til der skulpturen skal stå, dumpar vi 300 kubikkmeter med pukkstein, slik at kranene får løfta monumentet på plass. Etterpå må vi fjerne alt saman att, for så å dekke til med torv, fortel Ola Braanaas.

Den forsteina majesteten vert sendt frå Italia 2. juli, som var fødselsdagen til Kong Olav V sjølv.

- Han skal kvile i ei veke før han gjenoppstår i Gulen, skyt Per Vidar Ottesen frå Florø Rockeklubb inn.

Ventar 3 000

Rockeklubben står ansvarleg for det tekniske, samt booking av artistane til festivalen. Ottesen spår at dette sannsynlegvis er årets mest interessante kulturfestival.

- Vi reknar med i alle fall 3000 festivaldeltakarar den helga. Med eit amfi med sjøen og musikk som vert spelt opp mot kongen, solnedgang og dei omgjevnadene, vert dette ei oppleving av dei sjeldne, seier Ottesen.

At statuen får ei betre plassering enn på Rådhusplassen i Oslo, der den opphavleg var tenkt, er han i alle fall ikkje i tvil om.

- Kulturelt er dette det største som skjer i Sogn og Fjordane, held han fram.

Samarbeider

Skjerjehamn har kanskje aldri før hatt så mange personar samla samtidig. Om arrangørane får oppfylt ønsketenkinga om 3000 hovud, må mykje vere lagt til rette for deltakarane i forkant.

- Galeasen «Svanhild» kjem til å huse alle dei 20 artistane, som i utgangspunktet eigentleg ville ha enkeltrom. Då dei vart fortalt at dette var i utmarka, hadde dei ikkje noko imot løysinga, seier Per Vidar Ottesen.

Eit samarbeid med Fjord1 legg til rette for transport frå og til Florø, og det vert lagt til rette for tilreisande i privatbåtar. Billetten dekker alt som skjer festivalhelga.

Ei i rekka

Børge Bjartmann Bjerck stiller ut fotografia sine på to forskjellige utstillingar, og synest Utkantfestivalen er positivt for artist- og kunstnarmiljøet

- Denne sjansen Ola Braanaas gjev oss kunstnarar er vi veldig takknemlege for.

Skulptøren av kongemonumentet, Knut Steen, har òg gitt sine bidrag til kunstutstillinga den første dagen.

- Kjem dette til å verte ein årleg festival?

- Dette er berre ein av ei lang, lang rekke, konstaterer Ola Braanaas.