Etter at Kalvåg dykkarklubb har lege nede i årevis, har eit nytt initiativ blåst liv i laget. I helga deltok fem nye medlemer på eit intensivkurs der dei har lært dei grunnleggjande grepa.

Klubben hadde henta inn den erfarne dykkaren Per Kåre Navekvien frå West Dykkerservice i Måløy som instruktør, og under leiinga hans gjennomgjekk dei fem den teorien og praksisen som fører fram til godkjent grunnkurs.

- Det er perfekte forhold for allslags dykking her i området. Det er rett ut sagt eit eldorado - ein av den beste stadene i heile Sør-Norge, seier Navekvien. Det er først og fremst naturen, den under vassoverflata, han siktar til. Dyre- og plantelivet er rikt. Men ein treng heller ikkje reise langt for å finne vrak som kan by på spennande dykk.

Mellom kursdeltakarane var Arvid Langeland (55). Lysta til å dykke har han hatt i mange år, men det er først no han har realisert draumen.

- Alderen er inga hindring. Berre du er i nokolunde form og alt fungerer, går det bra, fortel han.

Også Svein Inge Fosse (52) var med på kurset. Han dykka «i gamle dagar», og hadde lyst til å ta opp att hobbyen. Som reiselivsmann ser han også eit potensial i dykkinga. Det at ein fagmann som Navekvien går god for Kalvåg-området sine undersjøiske kvalitetar, meiner Fosse er svært lovande. Han vil difor inngå eit samarbeid med dykkarklubben og vere med og utvikle dykkinga vidare som eit reiselivsprodukt.

Johnny Røys er leiar for dykkarklubben i Kalvåg. Han registrerer ei aukande interesse for klubben som no har 17 medlemmer. Mennene er i absolutt fleirtal, men Røys tykkjer det er gledeleg at det alt no har meldt seg fleire kvinner til det neste nybyrjarkurset, som vert arrangert om ein månads tid. Litt seinare skal dei også halde kurs for vidarekomne, opplyser han.