Dette er i samråd med Fylkesmannen i Sogn og Fjordane si innstilling.

Dermed vert ikkje lakse- og aurekonsesjonane til Steinvik Fiskefarm, Marø Havbruk, Svanøy Havbruk, Karma Havbruk og Karstensen Havbruk kring Svanøy i ytre delar av Førdefjorden berørte.

Flokenes Fiskefarm

Verre er det med familiebedrifta Flokenes Fiskefarm sine fire lokalitetar fordelte på to konsesjonar. Denne verksemda ligg inn forbi den nye grensa og vert råka av laksevernet. Men dei vert ikkje tvangsflytt ut av laksefjorden.

– No må vi sørgje for at forskrifta som skal gjelde blir til å leve med, slik at Flokenes Fiskefarm i framtida kan klare seg, seier Elin Tveit Sveen på Svanøy som i går var splitta kjenslemessig.

– For Svanøy-miljøet sin del kan eg vere letta, men det er kjempetrasig for dei oppdrettarane som vert råka av vernet. Særleg fordi dei nasjonale laksefjordane har så lite å seie for villaksen, påstår Sveen.

Ti nye råka

På landsbasis vert om lag ti nye havbrukslokalitetar i sjø råka når dei nye laksefjordane vert innfasa . Alle dei tre store fjordane i Sogn og Fjordane har vorte nasjonale laksefjordar. I tillegg er Dalsfjorden nasjonal laksefjord.

– Eg er først og fremst veldig skuffa over at regjeringa valde å frede Førdefjorden. Med dette er fylket vårt veldig hardt ramma. Vi har fått alt for mange av dei nasjonale laksefjordane, og eg har medkjensle med dei som vert råka ved Flokeneset, seier Sveen.

Til å leve med

Fiskeri- og havbruksnæringens sin landsorganisasjon (FHL) meiner regjeringa sitt framlegg er til å leve med.

– Sjølv om vi tviler på effekten av arealvern, er forslaget om åtte nye laksefjordar til å leve med for havbruksnæringa samla sett. Vi opplever framlegget som realistisk og løysningsorientert. Men vi beklagar samstundes sterkt at enkelte selskap vert svært hardt ramma av forslaget, seier styreleiar Sveinung Sandvik i FHL havbruk.