Fylkesordførarane Tom Tvedt (Rogaland), Torill Selsvold Nyborg (Hordaland), Olav Bratland (Møre og Romsdal) og Nils R. Sandal (Sogn og Fjordane) går i bresjen for å få ein ferjefri E39 gjennom heile Vestlandsregionen. Det vil koste kring 100 milliardar kroner å gjere E39 ferjefri mellom Stavanger og Trondheim. I helga gjekk startskotet for prosjektet med eit stort møte i Stavanger.

– Her står vi samla frå kommunar, fylkeskommunar og næringsliv. Alle er klare på at vi skal få dette til. Vi skal vere med på å betale bompengar og ber berre om å få lov til å begynne, seier fylkesordførar Tom Tvedt til NRK.

Samferdselsminister Magnhild Meltveit Kleppa viser til at finansieringa skal vere eit spleiselag mellom private og statlege midlar og påpeikar at prislappen ikkje skal vere noka hindring. Målet er å ha ein ferjefri E39 klar i 2025. Då må prosjektet inn i Nasjonal Transportplan for 2013.

Samstundes pågår arbeidet med å bygge Kystvegen Bergen-Ålesund ut frå fylkesvegmidlar. 45-minuttsregionen i området Flora, Bremanger og Vågsøy er del av den, og det er verdt ei høgtideleg flaggheising at Bremanger 2 no vert gjort heilt ferdig.

Likevel, når ferjefri E39 blir gjort til eit statleg prestisjeprosjekt, så trur vi at den gamle draumen om ferjefri kryssing i ytre Nordfjord kan skrinleggast ein gong for alle. Sats heller på gode ferjetilbod.

Bremanger 2 gir oss veg med gulstripe frå Sørdalen ved Svelgen og heilt til Hunskår aust på Bremanger-landet. Frå utløpet av Skatestraumtunnelen til ferjeleiet Oldeide-Måløy er det berre kring seks kilometer. Dette er eit moderne ferjeleie med overfartstid på kring halvtimen, der ein køyrer i land midt i Måløy sentrum.

Med tanke på alle dei andre vegutfordringane i 45-minuttsregionen, meiner vi at etableringa av eit nytt kostbart ferjeleie på Rugsundøy til Vemmelsvik i Vågsøy kan ofrast. Bygg heller seks kilometer tofeltsveg til Oldeide ferjekai og prioriter å utbetre andre delar av fylkesvegane mellom Flora og Vågsøy.