Det manglar ikkje på idear og gode intensjonar om å utvikle eigedommane i Trovik-kvartalet. Det er få saker som har fått meir spalteplass i vår avis dei seinare åra enn forfallet på den legendariske Kake-Bua og bygningane kring. Eigar av Trovik-eigedommane, Sverre Stenbakk, har gitt opp å få til noko etter å ha møtt krav om at bygningane ikkje kan rivast grunna høg kulturhistorisk verdi.

Florø-sjela det gamle arkitektoniske utrykket til området, skal takast vare på. Det er etter vårt syn rett, men det bør kunne opnast for ein kombinasjon med meir moderne uttrykk.

Kulturhageprosjektet og det nye prosjektet til Horne Brygge AS i vestre del av kvartalet, ber i seg håp om at det kanskje kan skje noko konkret snart. Tanken er at dersom det no aktuelle prosjektet til Horne Brygge kjem i gang, så kan det skape ein dominoeffekt og dra med seg utbygging på naboeigedommane også.

Utfordringa er at Horne Brygge må få offentleg godkjenning på at den gamle Horne-bua kan bli demontert og lagra. Vi er samd med styreleiar Tor Jacob Madsen i at det må vere viktigare å ta vare på det arkitektoniske utrykket i området, enn at det skal vere bygd opp av vindsliten fjøler og rusta spikar.

Alternativet til demontering er at Horne-bua blir flytta inn til ei anna sjøbu på naboeigedommen. Og der sit ein eigar som ikkje har sans for ufrivillig domino. Nettopp dette er symptomatisk for det som skjer, eller rettare sagt, ikkje skjer i Florø. Her står interessene til storsamfunnet opp mot lokale eigarar. I mellomtida byggjer nabobyen Førde opp ein stadig meir attraktiv by.

Vi håpar at Horne Brygge no vinn fram med sitt prosjekt og får bygd eit arkitektonisk akseptabelt forretnings- og bustadbygg. Og ingen ting ville vere betre enn om det skulle bli ein dominoeffekt og at det blir realisert i 2012. Men all erfaring viser at det er grunn til å vere skeptisk til om ei utvikling i kvartalet kan sikrast utan at storsamfunnet grip inn, oreignar eigedom og skaper eigarforhold som gir grunnlag for å utvikle kvartalet.