I ettermiddag står Frp-formann Siv Jensen som den mest prominente talaren når Israel-vener skipar til støttedemonstrasjon for Israel framfor stortinget. Det heile skjer samtidig med at hjarteskjerande bilete går verda over, av sivile lidingar som følge av militærmakta Israel si bombing og påfølgjande bakkeinvasjon på Gaza-stripa. Jensen sitt ja til invitten frå Indremisjonsforbundet, Internasjonale Kristne Ambassade Jerusalem og Med Israel For Fred, får endå sterkare politisk egg ved at leiaren i KrF og uttalt Israel-ven, Dagfinn Høybråten, seier nei til å delta i markeringa som talar. Denne avgjerda har Høybråten fått ros for i fleire media. Etter vårt syn blir det feil, og viser berre at moderne politikk etter kvart handlar meir om medie-timing enn ideologi. Viss Høybråten, til liks med Siv Jensen meiner at Israel sin aggresjon i Gaza er høgst berettiga, burde han stå fram og seie det. Og viss han meiner det motsette, burde han også våge å seie det i klårare ordelag enn kva han gjorde tidlegare i veka.

I morgon blir det skipa til støttedemonstrasjon i Florø for palestinarane i det krigsherja Gaza. Her vil fylkesleiar i FpU, Erlend Bøe, arrangere ein stille motdemonstrasjon til støtte for Israel. Lesarar av firdaposten.no er allereie i full gang med å debattere Erlend Bøe og FpU sitt prosjekt, og fleire ber han halde seg heime. Det bør han i våre auge ikkje gjere. Tvert om bør han bruke ytringsfridomen sin, flagge synspunkta sine, og synleggjere at ungdomspartiet han er fylkesleiar for, støttar moderpartiet i den kontroversielle saka. Då får også veljarar og framtidige veljarar eit godt synleg politisk landskap å navigere i, og kan gjere seg opp godt funderte politiske synspunkt.

At eit stort fleirtal av landets befolkning vil oppleve støttedemonstrasjonar for Israel som hånleg, mangel på empati og fullstendig malplassert, slik situasjonen no er, det blir ein heilt annan skål. Men noko av det første som går tapt i samfunn der menneske blir undertrykte, er nettopp ytringsfridomen. Difor må denne demokratiske retten hegnast om, særleg når frontane blir krasse og krisa rår.