Han har no starta opp Nordfjord Performing Arts Academy saman med Candice Bredesen, som har fått mykje av æra for danse-interessa som oppstod i Florø for nokre år sidan. Dei underviser barn frå tre år og oppover til vaksne. Dei gjev også sangundervisning og blandar gjerne danseklassane for vaksne med fitness-trening.

Rundt 40 elevar har fått si første innføring i dans på sommarskulen denne veka.

– Dei får prøve alt. Naomi Bailie underviser i klassisk og Liam Pentland i street dance, seier Nydal, og legg til at han er glad dei har greidd å få med ein del gutar på sommarskulen.

Dei to som underviser saman med han møtte han på Hammond School of dance and musical theatre i Chester i England, der han tok si utdanning. No har han leigd dei inn for å undervise på sommarskulen. Han meiner dei representerer noko Florø ikkje har frå før sjølv om tilbodet i byen må seiast å vere mangfaldig innan for dans:

– Vi er utdanna, profesjonelle dansarar som driv med dans sjølv, vi koreograferer og vi set opp framsyningar.