Saman med Walkenhorst, skal den lokale kunstnaren Per Grøtting stille ut bileta sine.

Bob Walkenhorst er mest kjend som vokalist i The Rainmakers, som skal ha konsert i byen under SommarFlora. Frå slutten av 80-talet har The Rainmakers stått spesielt sterkt i Skandiniavia og har vore hyppige gjestar her. Men det ikkje fullt så mange har visst, er at Walkenhorst parallellt med musikarlivet er ein anerkjend biletkunstnar som no stiller ut for første gong i Norge. Det er Per Øyvind Helle i SommarFlora som har fått konstellasjonen i stand:

– The Rainmakers har vore ein av mine favorittar sidan 80-talet, og då eg fekk vite at Bob Walkenhorst også er biletkunstnar, tok eg kontakt med managmentet for å høyre om han kunne tenke seg å stille ut bileta sine når han likevel skulle til Florø, seier Helle. Han legg til at SommarFlora gjerne vil bidra til å utvide spekteret av sentrumsaktivitetar. Då også Flora Kunstlag tende på idéen og Halvor Halvorsen gjenopna Hagen og slik sett sytte for utstillingslokale, var det berre å gå i gong.

Men Walkenhorst sine bilete skal altså dele plass med ein kjend og skatta lokal kunstnar - Per Grøtting. Han arbeider mykje i akryl på lerret, men tek og i bruk treskulptur og blandingsteknikkar der skulpturale element inngår, og er innkjøpt av mellom andre Flora kommune og Sunnfjord Medisinske Senter. Grøtting har mange utstillingar bak seg, og hadde separatutstilling på Kystmuséet i 2008.

Utstillinga opnar altså fredag og vil henge i to veker, men kanskje vert avslutninga enno litt meir spesiell:

– Laurdag 30. juni vil Walkenhorst sjølv komme på Hagen og fortelje litt om bileta sine, og ein skal aldri sei aldri, det kan jo hende han har teke med seg gitaren før den store konserten om kvelden, seier Per Øvind Helle håpefullt.