Og i framtida vil alle songane deira ha norsk tekst. Det stadfestar vokalist Jan Kjetil Klubben.

– Du kan seie at det har gått opp for oss at vi er norske, vi kjem difor til å syngje på norsk framover. Men vi held på bandnamnet, sjølv om det er engelsk, smiler Klubben og legg til at grunnen til språk-snuen også er at norske låtar er i skotet som aldri før.

– Honningbarna og Skambankt og andre norske band viser at norske tekstar slår meir an enn dei engelskspråklege, seier Klubben.

Allereie har bandet spelt inn to songar på norsk. Dei ligg ute på NRK Urørt. Punch arbeider no med å ordne finansieringa til det aller første albumet med norske tekstar, der desse to første songane kjem til å vere med.

Punch har også sikra seg avtale med Eirik Husabø om sjølve innspelinga. Men når han får sleppe til avheng av når finansieringa er på plass.

– Vi har ein del søknader inne på kulturstøtte. Dette arbeidet har vore fokuset vårt så langt i år, så konsertmessig har vi ikkje sikra oss så veldig mange oppdrag enno, seier Klubben og legg til at det ikkje er så veldig lett å sleppe til på dei større arrangementa.