Fredag ettermiddag var det duka for Kulturskulen sin faste vårkonsert i Samfunnshuset, der kulturskule-elevane fekk høve til å vise kor gode dei er.

Mellom dei som med sommarfuglar i magen stilte på scenen, var 11 år gamle August Arenz Sunnarvik Waaraas. Under framføringa av Leonard Cohen sin "Hallelujah" stod han heilt aleine framme på scenen, langt unna bandet i bakgrunnen og song.

- Det var gøy, men når eg syng er eg veldig nervøs. Spesielt når eg aldri har sunge solo før, smiler August etter konserten.

Det er dette Kulturskulekonsertane handlar om: Meistringskjensla og gleden. Men då er det kjekt å ha foreldre i salen ein kan vise talentet sitt fram til. August hadde rett nok stolte slektningar i salen, men ut frå oppmøtet å dømme var det fleire av elevane som ikkje hadde det.

- Det som slår meg er at dei då har gått glipp av noko. Det var ein veldig fin konsert, og ungane viste høgt nivå, slår kulturskulerektor Arne Sunnarvik fast.

- Men dette med meistring er noko av det viktigaste vi driv med på kulturskulen. Difor er det så viktig at foreldra får med seg desse konsertane, understreka han.