- Eg har stått og grine medan eg har stått og sett på dykk her frå sidelinja. Eg er så stolt over å få lov til å trene dykk.

Instruktør i Florø Drill, Anja Knudsen, klarer ikkje halde tårene attende då heile drilltroppen på 45 jenter er samla i garderoben etter nyttårsframsyninga i samfunnshuset laurdag kveld. Og stolt, det har ho all grunn til å vere. I to timar leverte jentene eit sceneshow som var både spenstig, sjarmerande og av og til ganske så spinnvilt - med innslag som varierte frå lyrisk drilldans til flagg, showparade og moderne dans.

For det er ikkje berre berre å drille, som Maja Oline Klokkernes Olsen (8), Ingrid Heggheim Brandsøy (8) og Malin Brugger Søfteland seier. Dei er alle aspirantar i drilltroppen.

- Anja er veldig flink og snill, og ho har lært oss masse. Men for å bli flinke må vi også øve masse, også heime, seier Maja.

Men det er ikkje så lett, for ein ting er å snurre ein stav, noko anna er å kaste den opp i lufta og ta imot den etterpå. Enklare blir det ikkje å gjere det, medan ein fullsett samfunnshussal ser på deg.

- Vi har ikkje knust noko når vi misser staven under øving heime, men ein stund måtte vi trene i hagen for tryggleiks skuld, ler jentene.

Les meir i tysdagsutåva av Firdaposten.