Med god støtte frå eit stort frivillig nettverk, lokale kulturaktørar og eit raust næringsliv, har initiativet gjort julekvelden til ei fin oppleving for fleire og fleire. Første gongen, i «Mangfaldsåret» i 2008 samla dei 90 menneske. I 2009 var dei heile 150 til bords, heiter det i grunngjevinga.

Alternativ jul held ope hus julaftan. Alle er inviterte, uansett grunn, og på tvers av tru og politiske særinteresser. Arrangementet er basert på frivillige hjelparar til å lage mat, transportere folk og til underhaldning.

Firdaposten skreiv etter siste års arrangement følgjande: ”Det velbrukte ordet suksess kan gjerne brukast for å karakterisere det som Herdis Seim og gjengen bak Alternativ jul fekk til i Flora samfunnshus på julaftan.”

Herdis Seim har mange gonger delteke i dugnadsløfta til Kirkens Bymisjon i Bergen og Oslo, for at dei som ikkje har nokon å feire jul saman med skal ha eit tilbod. Ho ønskte å bruke erfaringane sine i heimbyen Florø, fordi ho visste det var behov for det. Mange sit åleine på julekvelden, sjølv på ein liten plass som Florø.

I tillegg har dei også arrangert julegåveinnsamling til Lioliai Skule i Kelme i samarbeid med Florø barneskole, og driftar ei webside på mange ulike språk.