– Vi i husflidslaget ønskte å gjere noko i samband med byjubileet, men var først usikker på kva vi skulle finne på. Det seier leiar i husflidslaget, Britt Madsen.

Løysinga fann flidsdamene i ei unik, lokal brudedrakt inspirert av sunnfjordbunaden. Den hadde liggje urørt i eit bankkvelv i 20 år, uferdig. Til no er berre forkledet og stakken ferdig sydd, medan det står att å lage til den tilhøyrande jakka.

Husflidslaget håper at dei har ei komplett drakt ferdig til sjølve jubileumsdagen. Innan den tid skal også kystmuseet restaurere og reinse brurekrona; den fleire hundre år gamle «Rylandskrona» frå Bremanger. Drakta og Rylandskrona skal stillast ut saman på Kystmuseet i høve byjubileet.

Men det stoppar ikkje der. Husflidslaget har hatt fleire førespurnader frå kvinner som har lyst til å stå kronebrud. No gjev dei brurepar i jubileumsåret ein unik sjanse.

– Vi synest det hadde vore kjekt å fått eit jubileumsbrurepar til å bruke både drakt og krone under sitt bryllaup, seier Madsen.

Men det blir nok ikkje høve til å bruke Rylandskrona til dette føremålet. Om ein ønskjer det går det an å leige ei anna, dog ikkje fullt så gamal brurekrone, opplyser Kystmuseet.