I samband med at Flåmsbrygga Hotell i Flåm inviterer til nyopning på Flåmstova Restaurant på Furukroa laurdag 13. mars, har dei vore så heldige å få folkemusikkgruppa Five Men in a Boat til å spele i Ægir Bryggeri.

Gruppa er denne veka ute på turné og avsluttar i Flåm etter konsertar i Oslo (torsdag) og Fredrikstad (fredag).

- Dette vert ein spesiell dag for oss, seier Anny Hegrenes, resepsjons- og bookingsjef ved hotellet.

- Vi er spente framfor opninga av Flåmstova som no står fram med heilt ny stil. Og eg kan love ein stor buffet, med nye og spennande smakar, legg ho til.

Og når Five Men in a Boat går på scena i Ægir, er det fem markante folkemusikkartistar frå tre forskjellige land som har tatt hyre om bord i den same båten. Då må det berre bli tunge dønningar.

Til saman har gruppa ein kulturell ballast heilt utanom det vanlege, med stor formidlingsevne i tillegg.

Norge er representert i Five Men in a Boat med folkesongaren Frode Nyvold og verdsbergensaren Gabriel Fliflet. Dei må reknast som nestorar i det norske folkemusikkmiljøet.

Emmanuel Pariselle og Didier Oliver er blant Frankrikes fremste aktørar, og dei kan ause frå eit enormt repertoar av songstoff og dansemusikk.

Den femte i båten er engelskmannen Richard Burgess som i mange år har overført Storbritannias maritime songskatt til norske tilhøyrarar.