Helga 12-14 mars har Nærleiken – slipsmuseum, kaffibar og sjelevarmar - vore så heldige å få Unni Løvlid til å halde eit kurs i folkesong i Eikefjord.

– Kurset med Løvlid kjem utan tvil under vårt viktigaste satsingsområde; nemleg å vere ein ”sjelevarmar” i lokalsamfunnet, seier innehavar Gro Rukan.

Kurset går over 3 dagar og vert avslutta med ein felles kyrkjekonsert i Eikefjord kyrkje.

- Det er enno nokre ledige plassar på kurset, fortel Rukan, men interessa er stor, så dei som vil delta må vere raske til å ta kontakt.

Folkesongaren Unni Løvlid frå Hornindal er ei av Noregs mest markante folkemusikarar; tru til folkemusikken, men likevel nyskapande. I 2006 vart ho utropt til Årets Folkemusikkartist.

Løvlid har gjort fleire CD-utgivingar, både som soloartist og i lag med andre.

- Unni Løvlid er ein kvedar eg har vore begeistra for i mange år. Både stemma hennar og den energien ho syner frå scena gjer ho til ein artist i særklasse, seier Rukan.

- Eg er overtydd om at kursdeltakarane har mykje godt i vente, legg Rukan begeistra til.

Og alle som vil høyre resultatet av kurset bør få med seg konserten i Eikefjord kyrkje sundag 14. mars.