Det vart bevist søndag, då Dans utan grenser arrangerte breakdance-kurs i Samfunnshuset. – Berre for gutane.

– Det er noko med musikken, triksinga og dei vanskelege bevegelsene som gjer at eg diggar breakdance.

Det seier Matias Eikås (12). Saman med kompisane Kristian Woxholt (11), Ole Henrik Sundal (11) og Steffen Brandsøy (12) breakar dei så armar og rygg verker. Men klage gjer dei ikkje.

– Breakdance er kult. Eg har dansa breakdance i to år. Det byrja med at eg såg nokre breakdance-filmar på Youtube, og gjekk ut i hagen og prøvte det dei gjorde på filmane. Sidan då har eg øvt mykje, legg Kristian til.

Dei 23 gutane som deltok på kurset, nokre for første gong, andre litt meir rutinerte, er eit høgst velkommen tilskot til dansemiljøet i Flora.

– Breakdance er dritkult, sjølv om det er dans. Men det er dessverre altfor få gutar som driv med dansing i Florø. Med dette kurset prøver vi gje ein smaksprøve – ein smaksprøve som skal gje meirsmak.

Det seier Bjørnar Tresnes Vårvik, ein av dei tre unge instruktørane frå Dans utan grenser.