Jobben skal ho dele med Synnøve Herstad, som er busett i Ausevika og i tillegg har fått ansvar for å passe på det nye anlegget.

Omvising kvar søndag

Det var den nye kultursjefen, Anita Solbakken, som tok initiativ til organisert omvising i Ausevik. Vikarierande dagleg leiar på turistkontoret, Anita Schinharl, handla kjapt. No vil ein guide stå klar til å vise deg rundt kvar søndag, for under hundre kroner. Berre denne helga blir omvisinga på laurdag, i samband med feiring av det første byggesteget i oppgraderinga av Ausevik.

Heartness har den fordelen at ho snakkar både engelsk, tysk, spansk og sunnfjordsk. Det kjem av at ho har brukt store delar av livet sitt på å reise, og har mellom anna budd mange år i Canada. Men som lita var ho mykje i Ausevika.

Ikkje utan bil eller sykkel

Skal ein delta på guida tur i Ausevik må ein ha bil eller sykkel. Turistkontoret vil ikkje organisere båt- eller busstur til staden, men anbefaler at ein tek med seg sykkelen på båt til Stavang og syklar det siste stykket sjølv. Sidan det ikkje finst sykkelutleige i dag verken i Florø eller Stavang, blir det ikkje lett for turistar utan bil å ta del i opplegget.

– Dette initiativet vart til på overtid, og blir eit prøveprosjekt i sommar. Men det er mykje bra på gang i Ausevik, mellom anna vil vi legge ut informasjon på tre språk til dei som kjem dit andre dagar. Og sjølvsagt vil vi gjerne stille med guide også andre dagar, det er berre å ta kontakt, seier Schinharl.